• vtem news box

Class 6,7 and 8 Tibetan PPT

ངོ་སྤྲོད།


འཛིན་རིམ་དྲུག་པའི་བོད་ཀྱི་སྐད་ཡིག་གློག་སྟོན་བརྙན་རིས་

འཛིན་རིམ་བརྒྱད་པའི་བོད་ཀྱི་སྐད་ཡིག་གློག་སྟོན་བརྙན་རིས་

སྤྱིར་ཚན་རིག་སོགས་དེང་རབས་ཀྱི་སློབ་ཚན་གང་ཡང་རུང་བའི་བརྗོད་གཞི་བྱེ་བྲག་པ་ཞིག་གི་ཁྲིད་ཐབས་དྲ་ཐོག་འཚོལ་བཤེར་བྱེད་སྐབས། སོ་སོས་འཚོལ་བཤེར་བྱས་པའི་བརྗོད་གཞི་དེའི་ཁྲིད་ཐབས་ཀྱི་ལམ་སྟོན་འགུལ་རིས་དང་ཡིག་ཐོག་སོགས་སུ་ཕབ་ལེན་དང་ལྟ་ཞིབ་བྱ་རྒྱུ་ཡོད་པ་ནི་མངོན་སུམ་མོད། འོན་ཀྱང་རང་རེ་གཏན་ཉིན་སློབ་གྲྭ་ཁག་གི་བོད་ཡིག་དགེ་རྒན་རྣམས་ལ་འདི་ལྟའི་མཐུན་རྐྱེན་དྲ་ཐོག་ནས་ཕབ་ལེན་དང་ལྟ་ཞིབ་ལམ་སྟོན་ཞུ་ས་ཆེས་ཉུང་བའི་རྐྱེན་གྱིས། འདས་པའི་ལོ་མང་ཞིག་ནས་སྤྱི་སྒེར་ཁག་ནས་བོད་ཡིག་སློབ་ཁྲིད་ཐབས་ལམ་དེང་རབས་དང་མཐུན་པ་མེད་ལུགས་དགོངས་འཆར་བསྟུད་མར་འབྱུང་བཞིན་པར་བརྟེན། ཤེས་རིག་ལས་ཁུངས་ནས་འཛིན་རིམ་དྲུག་པ་ནས་བརྒྱད་པ་བར་གྱི་བོད་ཀྱི་སྐད་ཡིག་འདི་བཞིན་གློག་སྟོན་བརྙན་རིས་བརྒྱུད་ཁྲིད་ཐབས་ཀྱི་རྒྱུ་ཆ་ཞིག་བཟོ་རྒྱུའི་ལས་འཆར་བསྒྲིགས་ཏེ། མེས་དབོན་གཙུག་ལག་དཔེ་སྟོན་སློབ་གྲྭའི་བོད་དགེ་ཟླ་བ་ཚེ་རིང་ལགས་སུ་རེ་སྐུལ་ཞུས་པ་ལྟར། ཁོང་གིས་ལྷག་བསམ་གཡོ་མེད་ཀྱིས་སྒེར་གྱི་གུང་སེང་སོགས་ལ་ལྟོས་མེད་དུས་ཚོད་གང་མང་བཏང་སྟེ། ད་ཆ་འཛིན་རིམ་དྲུག་པ་ནས་བརྒྱད་པ་བར་གྱི་བོད་ཀྱི་སྐད་ཡིག་སློབ་ཚན་ཡོངས་སུ་རྫོགས་པ་གློག་སྟོན་བརྙན་རིས་བརྒྱུད་ཁྲིད་ཐབས་ཀྱི་རྒྱུ་ཆ་འདི་ཉིད་ལེགས་གྲུབ་བྱུང་ཡོད་པ་དང་། འཛིན་རིམ་དྲུག་པའི་གློག་སྟོན་བརྙན་རིས་ངོས་གྲངས་ ༢༢༣ དང་། འཛིན་རིམ་བདུན་པར་ ༢༥༠ འཛིན་རིམ་བརྒྱད་པར་ ༣༡༢ བཅས་ཁྱོན་བསྡོམས་བརྙན་རིས་ངོས་གྲངས་ ༧༨༥ ཡོད། རྒྱུ་ཆ་འདི་ཉིད་གཏན་ཉིན་སློབ་གྲྭ་ཁག་གི་བོད་ཡིག་དགེ་རྒན་རྣམས་ལ་མ་འོངས་པར་བོད་ཡིག་སློབ་ཁྲིད་སྐབས་དེང་རབས་ཀྱི་འཕྲུལ་ཆས་བེད་སྤྱོད་ཡོང་ཐབས་སུ་མཐུན་རྐྱེན་གྱི་ས་བོན་ཙམ་ཡིན་པས། བོད་དགེ་གང་ཞིག་རྒྱུན་དུ་འདི་ལྟའི་ཁྲིད་ཐབས་ལག་ལེན་གནང་མཁན་ཁག་ནས་རྒྱུ་ཆ་འདིའི་ནང་དོན་དང་བཀོད་སྒྲིག་གི་བང་རིམ་སོགས་ལ་ངེས་པར་བཟོ་བཅོས་དགོས་ངེས་གཟིགས་ཚེ་ཅི་བདེར་གནང་འཐུས་ཆོག་པ་མ་ཟད། ལྷག་བསམ་རྣམ་པར་དག་པའི་ལེགས་སྤེལ་ཉེས་འགོག་གི་དགོངས་འཆར་ཇི་ཡོད་ཤེས་རིག་སྲོལ་རྒྱུན་ཚན་པའམ། ཡང་ན་དཔེ་སྟོན་སློབ་གྲྭའི་བོད་དགེ་ཟླ་བ་ཚེ་རིང་ལགས་སུ་ངེས་པར་འབྲེལ་གཏུགས་གནང་རོགས་ཞུ། ཤེས་རིག་ལས་ཁུངས་ནས། ཕྱི་ལོ་ ༢༠༡༨ ཟླ་ ༥ ཚེས་ ༤ ལ།