• vtem news box

འཛིན་གྲྭའི་དགེ་རྒན་གྱིས་སློབ་མར་རྒྱུས་ལོན་པའི་ཐབས་ལམ་སྐོར་རགས་ཙམ་གླེང་བ།

འདོན་སྤེལ། ༢༠༡༡ / ༠༩ / ༢༠
ཡོང་ཁུངས། 《མཚོ་སྔོན་བོད་ཡིག་གསར་འགྱུར》 རྩོམ་པ་པོ། ལྷ་རྒྱལ་ཚེ་རིང་། འབྲུག་མོས་ཞུས།
འཛིན་གྲྭའི་དགེ་རྒན་གྱིས་སློབ་མར་རྒྱུས་ལོན་གསལ་བོ་བྱེད་པ་ནི། འཛིན་གྲྭའི་དགེ་རྒན་གྱི་བྱ་བ་ནུས་ལྡན་དུ་སྒྲུབ་པའི་སྔོན་འགྲོ་དང་རྨང་གཞི་ལྟ་བུ་ཡིན། རྒྱུས་ལོན་གསལ་བོ་བྱེད་པའི་དམིགས་ཡུལ་ནི་སློབ་མར་སློབ་གསོ་གཏོང་བ་དང་། རྒྱུས་ལོན་ཡོད་པའི་སྒོ་ནས་སློབ་གསོ་གཏོང་བ་དང་། སློབ་གསོ་ཁྲོད་སྔར་ལས་ལྷག་པའི་སྒོ་ནས་རྒྱུས་ལོན་པར་བྱ་དགོས་པ་དེ་ཡིན། དེས་ན་འཛིན་གྲྭའི་དགེ་རྒན་གྱིས་སློབ་མར་རྒྱུས་ལོན་གསལ་བོ་བྱེད་ཐབས་ལ་རྣམ་གྲངས་ལྔ་ཡོད་པར་སྙམ་སྟེ། ཡིག་ཐོག་དཔྱད་གཞི་དབྱེ་ཞིབ་བྱེད་ཐབས། ལྟ་ཞིབ་བྱེད་ཐབས། གླེང་མོལ་བྱེད་ཐབས། བརྟག་དཔྱད་བྱེད་ཐབས། དྲི་ཤོག་བྱེད་ཐབས་བཅས་སོ། །


༡༽ ཡིག་ཐོག་དཔྱད་གཞི་དབྱེ་ཞིབ་བྱེད་ཐབས་ནི་འཛིན་གྲྭའི་དགེ་རྒན་གྱིས་སློབ་མར་རྒྱུས་ལོན་བྱེད་ཐབས་ཤིག་སྟེ། སློབ་མའི་གནས་ཚུལ་བཀོད་པའི་ཡིག་ཐོག་དཔྱད་གཞི་བཀླགས་ནས་སློབ་མར་རྒྱུས་ལོན་བྱེད་པའི་བྱ་བ་ཞིག་ཡིན། དཔེར་ན་མཐར་ཕྱིན་ཐོ་འགོད་རེའུ་མིག་དང་། སློབ་མའི་ལུས་བརྟག་རེའུ་མིག རྒྱུགས་འབྲས་ཀྱི་སྐར་གྲངས། སློབ་མའི་སྐྱིད་སྡུག་གི་ཡིག་བྱང་སོགས་ཡིག་ཐོག་དཔྱད་གཞིར་བཀོད་ཡོད་པ་ནི་སློབ་མའི་འདས་སོང་གི་རྩ་བའི་གནས་ཚུལ་ཡིན་ཕྱིར་འཛིན་གྲྭའི་དགེ་རྒན་གྱིས་ཁྱོན་ཡོངས་ནས་སློབ་མར་རྒྱུས་ལོན་བྱེད་པར་ཟུར་བལྟའི་དཔྱད་གཞིར་མཁོ་སྤྲོད་བྱས་ཡོད།

༢༽ ལྟ་ཞིབ་བྱེད་ཐབས་ནི་འཛིན་གྲྭའི་དགེ་རྒན་གྱིས་སློབ་མར་རྒྱུས་ལོན་བྱེད་ཐབས་རྒྱུན་སྤྱོད་དུ་གྱུར་པ་ཞིག་སྟེ་སློབ་ཁྲིད་སྐབས་དང་། སློབ་ཕྱིའི་བྱ་འགུལ། འཛིན་གྲྭའི་བྱ་འགུལ་སོགས་བརྒྱུད་ནས་སློབ་མར་ལྟ་ཞིབ་དང་། སློབ་མའི་བསམ་བློ་ཀུན་སྤྱོད། བདེན་རྫུན་གྱི་དབྱེ་བ། ཁམས་དང་མོས་པ་སོགས་སློབ་མའི་དངོས་ཡོད་གནས་ཚུལ་རྒྱུས་ལོན་བྱེད་པ་ཞིག་ཡིན། ཡིན་ནའང་སློབ་མའི་སེམས་ཀྱི་འགྱུར་བ་རྟོགས་སླ་བ་ཞིག་མ་ཡིན་པས་འཛིན་གྲྭའི་དགེ་རྒན་ནས་སློབ་མ་དེ་འདི་ལྟ་བུ་དང་དེ་ལྟ་བུ་ཞིག་རེད་ཅེས་སྡོམ་ཚིག་འགོད་པར་སྔ་མི་རུང་།

༣༽ གླེང་མོལ་བྱེད་ཐབས། དེ་ནི་འཛིན་གྲྭའི་དགེ་རྒན་ནས་ཅིག་ཅར་དུ་སློབ་མར་རྒྱུས་ལོན་དང་བརྟག་ཞིབ་བྱེད་ཐབས་ཤིག་ཡིན་པ་དང་། དེས་འཛིན་གྲྭའི་དགེ་རྒན་དང་སློབ་མའི་བར་གྱི་བརྩེ་དུང་རྒྱུས་ལོན་བྱ་བར་བླ་ལྷག་གི་ནུས་པ་འདོན་བཞིན་ཡོད། དེ་ལ་དབྱེ་ན་གླེང་མོལ་དངོས་དང་གླེང་མོལ་དངོས་མ་ཡིན་པ་གཉིས་ཡོད་དེ། སྔ་མ་ནི་འཛིན་གྲྭའི་དགེ་རྒན་གྱིས་གླེང་མོལ་གྱི་གོ་རིམ་བཀོད་སྒྲིག་བྱས་ཡོད་པ་ལྟར་སྤེལ་བ་ཞིག་ཡིན། ཕྱི་མ་ནི་འཛིན་གྲྭའི་དགེ་རྒན་གྱིས་གནད་དོན་རྒྱུས་ལོན་བྱེད་དགོས་པའི་སྐབས་ཀྱི་དྲི་བ་འདོན་པ་སྟེ་གླེང་མོལ་གྱི་གོ་རིམ་སྤྱོད་མི་དགོས་པ་ཞིག་ཡིན།

༤༽ བརྟག་དཔྱད་བྱེད་ཐབས། དེ་ནི་འཛིན་གྲྭའི་དགེ་རྒན་གྱིས་སློབ་མར་རྒྱུས་ལོན་བརྟག་ཞིབ་བྱེད་པའི་ཐབས་ཤིག་སྟེ་རྣམ་པའི་ཐོག་ནས་བལྟས་ན་བྱེ་བྲག་གི་འཚམས་འདྲི་དང་། བཞུགས་མོལ་ཚོགས་འདུ། དྲི་ཤོག་བརྟག་དཔྱད་བཅས་ཡོད། ནང་དོན་གྱི་ཐད་ནས་བལྟས་ན་སྤྱིར་བཏང་གནས་ཚུལ་གྱི་རྒྱུས་ལོན་དང་། ཆེད་དུ་བྱ་བའི་དོན་ལ་རྒྱུས་ལོན་བྱེད་པ་གཉིས་སོ། །

༥༽ དྲི་ཤོག་བྱེད་ཐབས། དེ་ནི་འཛིན་གྲྭའི་དགེ་རྒན་གྱིས་སློབ་མར་རྒྱུས་ལོན་བྱེད་པའི་རམ་འདེགས་ཀྱི་ཐབས་ཤིག་སྟེ། འཛིན་གྲྭའི་དགེ་རྒན་གྱིས་རྒྱུགས་ཤོག་སྤྱད་དེ་སློབ་མ་རང་ངོས་ནས་ལན་འདེབས་པ་ཞིག་ཡིན། དེ་ལྟར་བྱེད་པའི་དམིགས་ཡུལ་ནི་གནས་ཚུལ་རྒྱུས་ལོན་བྱེད་པའི་ཆེད་དུ་ཡིན་ལ། དྲི་ཤོག་དེ་མྱུར་བར་དག་སྒྲིག་དང་དབྱེ་ཞིབ། རིགས་བསྡུ་བཅས་བྱེད་དགོས། དྲི་ཤོག་སྟེང་མིང་ཡིག་འབྲི་མི་འབྲི་ནི་སློབ་མའི་འདོད་མོས་ལྟར་བགྱི་བ་ལས་བཙན་ཐབས་བྱེད་མི་རུང་ངོ་། །